fbpx

Lenses – أساسيات التصوير : ٢ العدسات

 

قبل ما نبتدى ياريت تقروا الدرس الآول من هنا عشان تبقوا متابعين معايا  

درس النهاردة فيه تفاصيل كتير وأرقام ومعادلات أكتر  فركزوا جدا وانتوا بتقروا عشان تفهموا الموضوع ..

درس النهاردة عن العدسات ” كان المفروض يبقى عن العدسات والفلاتر مع بعض لكن أنا فضلت افصلهم عشان ندى كل جزء منهم حقه …

فى الأول نعرف العدسة دى بتعمل إية وبتتكون من إية 

العدسه هي الجسم المسئول عن نقل الصورة ( الضوء المنعكس علي الاجسام لسينسور الكاميرا ) واللي بدوره بيسجلها والكاميرا بتعملها معالجة وتحفظها في وسيله الحفظ – راجع الدرس الآول من هنا

الصورة دى بتشرح مراحل مرور الضوء بالعدسة لحد ما يوصل للسينسور الكاميرا” حد خد باله فى كام مرحلة “

عناصر العدسة من الداخل Lens Elements

يعنى العدسة هى اللى بتنقل الضوء من برة للسينسور وبالتالى ممكن العدسة تأثر على جودة الصورة وتخلى الكاميرا ما تطلعش الجودة بتاعتها كاملة

 ودى عيوب العدسات اللى لازم تبقى عارفها كويس عشان لما تدور على ريفيو لعدسة من على الانترنت

  ( بيتعالج في الايديت ) Loss of Contrast تقليل التباين الكونتراست – 

لا يعالج )  مش شارب -بتهرب فوكس – الصورة ناعمة) –

 ( يعالج في الايديت ) Chromatic Aberration  انحراف لونى وفيه بيبقى فيه تداخلات ألوان غير مرغوب فيها خصوصا على الحدود بين التكوين والخلفية  – 

  (يعالج بحدود ) Distortion تشوية فى آبعاد الصورة – 

 

الصورة دى فيها توضيح للمشاكل اللي ذكرناها فوق 

 

عيوب العدسات Lenses Problems
                               عيوب العدسات Lenses Problems  

كدة عرفنا العدسات وبتأثر على الصورة وجودتها إزاى وده هيساعدنا اننا نقرر نشتري ايه ومنشتريش ايه  ..نيجى بقى للجزء التانى ..الطول البؤرى اوالفوكال لينس

الطول البؤرى |Focal Length

الطول البؤرى للعدسة كل ما يكبر كل ما زاوية رؤية العدسة تبقى أضيق  يعنى العدسة ال 35 مللى بتشوف زاوية أوسع من العدسة ال50MM  والعدسة ال50MM  بتشوف زاوية اوسع من ال100MM مللى وهكذا ….

وكل ما الفوكال لينس يتغير تصنيف العدسة نفسه وبالتالى استخدامها بيتغير شوفوا الجدول ده هيوضح الفكرة 

screen-shot-2016-09-20-at-12-13-52-am-copy

كل مربع في الصوره دي  بيوضح البعد البؤري الخاص بيه لو هناخد نفس الكادر ببعد بؤري مختلف 

آمثله علي البعد البؤري Focal Length Examples
                                            آمثله علي البعد البؤري Focal Length Examples

 

علاقة الطول البؤرى باهتزاز الصورة 

عشان نفهم الموضوع ده ببساطة ..لو معاك كشاف ليزر ونورت أى حاجة قريبة منك وهزيت إيدك وجربت انك تنوره على مبنى بعيد وهزيت إيدك نفس الهزة إية اللى بيحصل ؟

الإهتزاز اللى حصل على الجسم القريب أقل بكتير اوى من اللى حصل على البعيد 

وده نفس الفكرة اللى بتوضح علاقة اهتزاز الصورة بالفوكال لينس .. 

كل ما الفوكال لينس يزيد كل ما خطر إن يحصل اهتزاز فى الصورة يزيد ..طب نحسبها إزاى ؟ 

ببساطة خلى الشاتر بتاعك لو عدستك ما فيهاش فى أر ( مانع أهتزاز ) ميقلش عن واحد على رقم الفوكل لينس ..

ده لو كاميرتك فل فريم ولو كاميرتك كروب فريم احسب الطول البؤرى الحقيقى لعدستك واقسم عليه 

( ملحوظة الطؤل البؤرى للعدسة بيتغير مع حجم السينسور يعنى العدسة ال 35 على الفل فريم بتدى تقريبا 52 مللى على  الكروب فريم عشان تحسب معدل الكروب إضرب الفوكال لينس فى 1.5 لو نيكون و 1.6 لو كانون )

معنى كدة ان لو عملنا الفوكال لينس 250 فأقل شاتر سبيد” سرعة غالق ” نقدر نستخدمها هي 1/250 

أما بقي  لو العدسه فيها مانع اهتزاز هتقدر تقلل السرعه من ٣ لاربع مرات حسب العدسة يعني ايه : يعني لو كنت مستخدم عدسه ٢٥٠ الشاتر الاقل يبقي ١/٢٥٠ لو في مانع اهتزاز وقللت ل ١/١٢٥  دي كده مرة  قللت ل ١/٦٠ يبقي مرتين والمره دي بتتسمي ال Stop.

مانع الإهتزاز VR-IS-OS-OIS-VC

كل الاختصارات دى معناها مانع الاهتزاز بس بتختلف من شركة للتانية 

VR – Nikon 

IS – Canon 

OSS – Sony 

OIS   – Panasonic , samsung, Fujitsu and Leica

OS – Sigma

VC- Tamron

SR – Pentax

PureView – Nokia 

UltraPixel – HTC

فكرة مانع الإهتزاز هو وجود ديناميكية جوه العدسة بتتحرك مع هزة إيدك وده بيخليك تقدر تصور بشاتر أبطا شوية من الطبيعى وتتجنب اهتزاز الصورة ..موقع نيكون حاطط فيديو شارح  الموضوع تقنيا وبيخليك تجرب تقفل مانع الاهتزاز وتفتحه  للى عايز يشوفه من هنا  

العدسات البرايم ” الثابتة ” والعدسات الزووم 

Zoom Lenses Vs. Prime Lenses

العدسات البرايم ببساطة هى عدسات ببعد بؤرى واحد ما بتتحركش زى العدسة ال 35 او ال 50 او 85 وخلافه وده اللى بيخلى الكواليتى بتاعتها أعلى بكتير من العدسات الزووم حتى الزووم الغالية  لو الاثنين فيهم نفس الآلية ونوع الزجاج 

 وطبعا لإن العدسات البرايم فتحة العدسة بتبقى واسعة جدا فبتقدر تصور بيها بالليل بشاتر عالى نسبياً عن العدسات الزووم تاريخيا أول حاجة اتعملت كانت العدسات البرايم وبعد كده عشان يدوا مرونة اكتر للمصورين عملوا العدسات الزووم اللى بتبقى بتتحرك بين بعدين بؤريين زي 18-55 آو 18-135 آو 70-300 وهكذا

العدسات البرايم لحد دلوقتي فيها امكانيه عمل فتحات عدسة واسعة جدا وصلت في بعض الموديلات ل ٠.٩٥ يعني اقل من  F1 و عشان نعرف الفرق الكبير والإضافة اللى بتعملها العدسة البرايم للى بيصور بيها تعالوا نشوف الفرق بين كمية الضوء اللى بتدخلها العدسة البرايم للسينسور و العدسة الزووم فى الجدول ده ( ملحوظة دلوقتي سيجما نزلت عدسات زووم بفتحه ١.٨ )

علاقة فتحه العدسة بالضوء

 

وطبعا بتفرق فى العزل و سرعه الشاتر اللي نقدر نستخدمها خصوصا في الإضاءة الضعيفة الجدول ده شارح الموضوع بالتفصيل

علاقة فتحة العدسة بالشاتر والآيزو وعمق الميدان

 

..

 بخصوص الجودة فشركات العدسات  مافاتهاش الموضوع فعملت العدسات الزووم اللى بتدى كواليتى عالية مقارنة بعدسات الزووم العادية لكنها مقدرتش توصل لجودة العدسات البرايم فى كل الأحوال 

نيكون سمتها ال N Series 
وكانون سميتها ال L Series

..

فى بعض العدسات الزووم  أضيق فتحة عدسة بتتغير مع تغير الفوكال لينس اللى انت عليه يعنى فى ال 18-55 لو على  18 تلاقى اوسع فتحة ٣.٥ و اضيق فتحة عدسة ٢٩ مثلا ولو على 55 تلاقى اوسع فتحه ٥.٦ اضيق رقم 36 وهكذا

نصيحة بقى ..عشان توصل لأعلى جودة ما تصورش ولا على أعلى رقم فتحة عدسة ولا على أقل رقم فتحة عدسة خصوصا في العدسات الاقتصادية

..

لو عجبك الدرس شاركه مع صحابك واشترك في الموقع عشان يوصلك كل جديد 

المصادر 

Cambridge in colour

dpreview

digital-photography-school.com

kenrockwell

 

Comments

comments

%d bloggers like this: