السلام عليكم ..يارب تكونوا بخير 

 قبل أى حاجة راجعوا الدروس اللى فاتت من هنا 

درس النهاردة عن الفوكس وده من أهم العناصر اللى بتتحكم فى جودة الصورة 

 

الفوكس يعنى التركيز ويطلق اصطلاحا على المنطقة التى يكون عليها التركيز أكتر فى الصورة يعنى المنطقة اللى بتكون واضحة وحادة أكتر من غيرها


 
 

 أول شئ  لازم أراعيه لما أجي أصور هو ان نقطة الفوكس تكون  على التكوين الأساسى أو الجزء الأساسى فى الصورة .. فكرة الفوكس هو المسافة اللى عندها الصورة بتبقى واضحة ولما بحرك حلقة الفوكس المسافة دى بتتغير بتقرب أو تبعد المسافة دى اسمها ( الفوكاس ديستانس ) 

  

وكل عدسة بيبقى ليها مكتوب عليها أقل فوكاس ديستنانس تقدر تقرب من الجسم اللى بنصوره فيها ودى اسمها Minimum focus distance

الفوكس ليه طريقتين مانويال وأوتوماتيك ..




تقدر تتنقل بين الاوتوفوكس والمانويال فوكس من الزرار ده

الفوكس اليدوى Manual Focus:

هو إنك بتحرك حلقة الفوكس الموجودة فى العدسة بإيدك لحد ما توصل للفوكس المطلوب ” أغلب الكاميرات بيبقي فيه في الفيو فايندرسهم او سهمين  فوق على الشمال بيتحركوا مع الفوكس المانويال وبيختفوا او شكلهم يتغير اول ما تبقي الحاجة في الفوكس – راجع كاتالوج كاميرتك لتفاصيل أكتر “ 

 

الفوكس الأوتوماتيكي AutoFocus :

فى الحالة دى الكاميرا اللى بتعمل فوكس على الجسم اللى انت بتصوره وده اللى هنشرحه بالتفصيل فى اللى جاى ..

 

 

تقنياً عشان الكاميرا تعمل فوكس فى حاجة اسمها فوكس سينسور هو اللى بيتحكم فى الاوتو فوكس عن طريق الخطوات دى واللى بتتم فى جزء من الثانية بيختلف من كاميرا للتانية :

1- بيبدء يغير فى الفوكس ديستانس يحرك حلقة الفوكس عشان يظبط الفوكس على الجسم اللى فى نقطة الفوكس

2-معالج الفوكس الأوتوماتيكى ( سينسور الفوكس ) بيقيم الفوكس ده عشان يشوف لو محتاج يتحسن

3-بيبدء يعمل تحسين للمسافة دى عشان يجيب أفضل فوكس ممكن

4-ممكن سينسور الفوكس يعيد الحاجتين اللى فاتوا دول لحد ما يوصل لعملية الفوكس السليمة 

 

طب إية الحاجات اللى بتأثر على عملية الفوكس : 

 

1- الإضاءة :

لو مكان مظلم الكاميرا مش هتقدر تعمل فوكس (كاميرات نيكون فيها لمبة صفرا بتنور عشان تخليك تعمل فوكس – أغلب كاميران كانون المبتدئين مش بيبقي فيها الموضوع ده )

2-الكونتراست فى الصورة :

كل ما كانت الصورة فيها تباين او الوانها كتير كانت عملية الفوكس أسهل ولو كان الهدف نفس لون الخلفية بتبقى عملية الفوكس أصعب 

3-الحركة :

الفوكس على الأجسام الثابتة أسهل بكتير من الفوكس على الأجسام المتحركة

4-الكاميرا نفسها :

فى نوعين من نقط الفوكس على حسب الكاميرا ( سينسور عمودى vertical line sensors– وسينسور ثنائى الأبعاد cross-type sensors ) طبعا السينسور ثنائى الأبعاد بيدى نتائج أفضل وأسرع منا لسينسور العمودى ..كمان عدد نقط الفوكس الأوتوماتيك فى الكاميرا بيفرق فى عملية الفوكس فى الحركة فى كاميرات بيبقى فيها 9نقط لحد 51 نقطة .

5– فتحة العدسة : كل ما فتحة العدسة بتضيق –الرقم بيكبر – كل ما عملية الفوكس بتبقى أصعب ونقط الفوكس الأوتوماتيك بتقل .

أوضاع الفوكس الاوتوماتيكى Auto Focus Modes  

أوضاع الفوكس في كاميرات الكانون والنيكون

 

وضع النقطة الواحدة Single point

  

فى نيكون إسمه AF-s

 وفى كانون اسمهone shot

  الوضع ده بيعمل عملية الفوكس مرة واحدة بس بعد ما بتدوس نص دوسة على زرار الشاتر وبيقفل الفوكس لحد ما تكمل الصورة ..يعنى لو الهدف اتحرك من مكانه الفوكس هيفضل على نفس المكان اللى كان فيه ومش هيتغير والنوع ده مناسب لتصوير الحاجات الثابته والبورترية والمنتجات والمناظر الطبيعية وخلافة .. 

وضع الفوكس المستمر  continuous Autofocus

 

فى نيكون إسمه  AF-C

 وفى كانون اسمه Al-servio

الوضع الكاميرا بتبدئ تعمل فوكس أول ما تدوس نص دوسة ولكن ما بتقفلش الفوكس فبالتالى لو الجسم اللى بتصوره اتحرك الكاميرا بتبتدى تتابع حركته عشان تعملك اوتوفوكس عليه

مناسب لتصوير الرياضة والحركة والحيوانات والطيور والأطفال

 

وضع الفوكس االأوتوماتيكى  Automatic Autofocus  

 

فى نيكون AF-A

 وفى كانون Al-Focus

فى المود ده الكاميرا هى اللى بتحدد تختار أنهى نوع من أنواع الفوكس اللى فوق دول سواء كان نقطة واحدة ولا مستمر وده بيبقى مناسب لو انت مش عارف الجسم اللى بتصوره هيتحرك ولا ثابت أو لتصوير المناسبات اللى فيها حركة كتير عموما والإيفينتات الرياضية .

 

فوكس اللا نهاية infinity Focus

 

وهنا بيبقى الكادر كله جوه الفوكس أو بمعنى أدق أغلب الكادر فى الفوكس يعنى بيدى أعلى عمق ميدان ممكن مهما كانت فتحة العدسة والطول البؤرى ليها

 الفوكس المالانهاية بيتأثر بأكتر من حاجة منها البعد البؤرى للعدسة وفتحة العدسة

فى حاجة إسمها الHyperfocal Distance  ودى أقل مسافة لازم يكون فيها أول جسم بعمل عليه فوكس عشان أقدر اعمل الفوكس مالا نهاية .. بتتأثر بأكترمن عامل منها الكاميرا ( كروب فريم ولا فل فريم – والعدسة وايد ولا تيلى وهكذا ..الجدول ده مبين المسافة دى بالنسبة للكاميرات الكروب فريم اللى الكروب فاكتور بتاعها 1.5X – اول سطر فيه الطول البؤرى للعدسة والجدول فيه فتحة العدسة والبعد بالمتر )

 1. تقدر تبعتلى موديل كاميرتك فى كومنت وهقولك الكروب فاكتور بتاعك كام , فى اكتر من برنامج بينزلوا على الموبايل  بيحسبلك المسافة دى زى DOF calculator – DOF Master

أخر حاجة هى الفوكس ستاكنج أو دمج الفوكس

ودى وسيلة بنستخدمها لما بنبقى عايزين نكبر المسافة اللى عايزين نخليها فى الفوكس مثلا نفترض إنى بصور منظر طبيعى وفى صخرة فى أول المنظر ده وفى نفس الوقت فى جبال وشجر وحاجات عايز اطلعها إن فوكس وعايز استخدم الفوكس مالانهاية أعمل إية ؟

الحل نى بثبت الكاميرا على تراى  بود ( حامل ثلاثى ) وباخد أكتر من لقطة كل لقطة فيهم بيكون الفوكس فيها على جزء معين وبعدين برجع احطهم على برامج متخصصة( زى الفوتوشوب – zerena staker- Combine ZM مثلا )  بتدمج الأجزاء اللى فى الفوكس فى كل صورة وتطلعلك صورة كلها شارب ..الأسلوب ده مشهور اكتر فى تصوير الماكرو ..

 

دلوقتى إزاى تختار نقطة الفوكس ..

Canon Focus Points

Nikon Focus points

عشان تقدر تتحكم فى نقطة الفوكس وتنقلها من مكان لمكان فى الكادر لازم تدخل جوه إعدادت كاميرتك وتشوف هتخليها تستخدم كام نقطة فوكس ولا هتخليها أوتوماتيك ( فى كاميرات بتخليك تحدد عدد النقط اللى تستخدمها أكتر من اختيار وده بيأثر فى سرعة الفوكس ) مع مراعاة إن الفوكس على نصف الكادر بيبقى دايما أفضل من الفوكس على الاطراف ..

هتلاقى نقطة الفوكس فى الفيو فايندر بتنور بلون أحمر وتقدر تحركها بالأسهم بعد ما تكون ظبطت من قائمة الكاميرا إنك تخليها نقطة واحدة ..

 




معلومة ع الماشى

 

إحنا قلنا إن الفوكس على الجسم فى النقطة اللى فى نص الكادر دايما بيبقى أفضل من الفوكس على الجسم فى أى نقطة فوكس تانية طيب لو فى جسم فى يمين الكادر وعايز أعمل فوكس عليه ..أعمل إية وانا عايز دقة النقطة اللى فى النص وفوكس على اليمين ؟ فى زرار فى أغلب الكاميرات إسمه Focus Lock  وده بيخليك تقدر تروح تعمل فوكس على الجسم اللى فى اليمين وتدوس عليه فيقفل الفوكس وما يخليش حلقة الفوكس تتحرك وتقدر تجيب الكادر يمين شوية وتحط التكوين بتاعك فى المكان اللى انت عايزه

 

كمان معلومة ع الماشى وناس كتير متلغبطين فيها 

لما الشركات قررت تعمل مواتير الأوتوفوكس نيكون قررت إنها تحط الموتور فى الكاميرا وبعد كدة ابتدت تنزل كاميرات من غير موتور وده اللى خلاها تنتج عدسات بموتور فوكس …العدسات اللى بموتور بيبقى عليها حرف G والعدسات اللى من غير موتور بيبقى عليها حرف D

أمثلة للكاميرات النيكون اللى فيها موتور 7000- d90 -7100 

أمثلة للكاميرات اللى مافيهاش موتور 3100-5100-5200-3200-5300

أما بالنسبة لكانون فقررت إنها تحط المواتير فى العدسات لما اخترعت تكنولوجيا EF وبالتالى أى كاميرا كانون هتشتريها بتشغل عدسات EF هتعمل فوكس أوتوماتيك لإن المواتير فى العدسات ..(مفيش ولا كاميرا كانون فيها موتور فوكس )

 

لو شايف الدروس مفيدة ما تبخلش على صحابك وشير خليهم يستفادوا ..  واشترك في قايمتنا البريدية من هنا عشان يجيلك كل الحاجات الجديدة ع الايميل 

 

المصادر والمراجع

Cambridgeincolour.com/

Digital-photography-school.com/

Digitalcameraworld.com/

Exposureguide.com/

 

Comments

comments

If you Liked This Post , Share it With your Friends

2 comments on “Focus أساسيات التصوير: ٤ الفوكس”

Leave a Reply

%d bloggers like this: